Australia u bashkua zyrtarisht këtë të mërkurë me programin satelitor Landsat Next, i cili  udhëhiqet nga SHBA për të mbështetur eksplorimin e minierave.

Ministrja e Jashtme Australiane, Penny Wong tha se krijimi i Partneritetit Australia-Shtetet e Bashkuara për “Landsat Next” do të bazohet në bashkëpunimin e tyre gati gjysmë shekullor në vëzhgimin e Tokës.

“Të dhënat satelitore të ofruara përmes këtij partneriteti jo vetëm që do të jenë të dobishme për dy vendet tona, por njohuritë e tij kritike do të ndihmojnë Indo-Paqësorin të optimizojë sigurinë ushqimore dhe prodhimin bujqësor, të përmirësojë planifikimin e infrastrukturës urbane dhe të përgatitet për fatkeqësitë,” tha ministrja.

Programi “Landsat Next”, që do të nisë në vitin 2031, do të vazhdojë gati 50 vjet bashkëpunimin e vëzhgimit të Tokës midis Geoscience Australia dhe Shërbimit Gjeologjik të Shteteve të Bashkuara.

Sipas marrëveshjes “Landsat Next”, Australia do të angazhojë 207.4 milionë dollarë gjatë katër viteve të ardhshme për Geoscience Australia për të zhvilluar aftësi të avancuara të përpunimit të të dhënave dhe analitikës.