Australia: Nuk do të rrisim çmimet e ilaçeve pas tarifave të Trump

Ministri australian i shëndetësisë, Mark Butler ka deklaruar se Australia nuk do t’i nënshtrohet presionit nga gjigantët farmaceutikë dhe administrata Trump. Ai shtoi se nuk do të rrisin çmimet e ilaçeve pas tarifës 100% të Trump për produktet farmaceutike të importuara në SHBA.

“Ne vazhdojmë t’i dërgojmë SHBA këtë mesazh shumë të qartë sepse e dimë që ata i vënë në vesh kompanitë e mëdha farmaceutike duke u përpjekur të shkatërrojnë PBS-në këtu në Australi dhe skemat ekuivalente në vende të tjera anembanë botës. Ne nuk po negociojmë për ato bazat”, tha ai.

Presidenti amerikan, Donald Trump vendosi një tarifë të re prej 100% për produktet farmaceutike të markave të importuara në SHBA duke u përpjekur t’i detyrojë prodhuesit të bien dakord për marrëveshje për çmimet e barnave ose të angazhohen për t’i prodhuar produktet e tyre brenda vendit.

Kjo është sfida më e fundit për prodhuesit australianë që u shesin produkte konsumatorëve amerikanë dhe vjen në një kohë kur Shtëpia e Bardhë përpiqet të detyrojë ndryshime në Skemën e Përfitimeve Farmaceutike të Australisë, e cila garanton çmime më të ulëta për mbajtësit e barnave me recetë.

Sipas një urdhri të ri ekzekutiv të nënshkruar nga Trump, kompanitë e mëdha farmaceutike do të kenë 120 ditë për të njoftuar planet për të shmangur tarifën e re, ndërsa kompanitë më të vogla kanë 180 ditë.

Kompanitë që bien dakord të zhvendosin prodhimin në SHBA mund të shohin një tarifë të reduktuar prej 20%, me disa përjashtime që u jepen kompanive që bien dakord për marrëveshje çmimesh preferenciale për konsumatorët amerikanë.

Australia eksporton ilaçe me vlerë rreth 2 miliardë dollarë në SHBA çdo vit. Gjigandi prodhues CSL përbën pjesën më të madhe të këtyre eksporteve me produkte të plazmës së gjakut, të cilat pritet të përfitojnë përjashtime nga tarifat e reja. Muajin e kaluar, CSL hapi një strukturë të re prodhimi në Illinois.

Plani i Trump pritet të përjashtojë ilaçet dhe të ruajë tarifa më të favorshme për ilaçet e prodhuara në Bashkimin Evropian, Japoni, Korenë e Jugut dhe Zvicër. Mbretëria e Bashkuar ka marrëveshjen e saj të veçantë tarifore.