Avionët luftarakë izraelitë bombardojnë qytetin e Gazës pas urdhrit të Netanyahut

Një valë sulmesh ajrore izraelite goditi Qytetin e Gazës, disa orë pasi zyra e kryeministrit izraelit tha se kryeministri Benjamin Netanyahu kishte urdhëruar ushtrinë të niste menjëherë sulme të rënda në Gaza, duke akuzuar Hamasin për shkelje të kushteve të armëpushimit.

Izraeli thuhet se kreu të paktën tre sulme ajrore, sipas Mbrojtjes Civile të Gazës.

Nuk pati asnjë koment të menjëhershëm nga Forcat e Mbrojtjes Izraelite (IDF).

Raportet fillestare nga zona thanë se sulmet goditën një zonë pranë spitalit më të madh që ende vepron në Gazën veriore. Qyteti i Gazës ndodhet në skajin verior të Rripit.

Vendimi i Netanyahut erdhi menjëherë pas një sulmi ndaj forcave izraelite në Gazën jugore, i cili shkaktoi zemërim në Izrael, si dhe incidente që lidhen me kthimin e trupave të pengjeve. Marrëveshja e armëpushimit ka qenë në fuqi vetëm për tre javë, pasi u arrit më 10 tetor. Që atëherë, si Hamasi ashtu edhe Izraeli kanë akuzuar njëri-tjetrin për shkelje.

Nga ana e tij, ministri Izraelit i Mbrojtjes, Israel Katz, tha se Hamasi do të paguajë një “çmim të lartë” për sulmin ndaj ushtarëve të IDF-së.

“Sulmi ndaj ushtarëve të IDF-së në Gaza sot nga organizata terroriste Hamas kalon një vijë të kuqe të hapur, ndaj së cilës IDF do të përgjigjet me forcë të madhe”, tha Katz në një deklaratë.

“Hamasi do të paguajë shtrenjtë për sulmin ndaj ushtarëve dhe për shkeljen e marrëveshjes për kthimin e trupave të pengjeve”, shtoi ai.