Avioni privat përplaset gjatë uljes emergjente në Republikën Dominikane, shpërthen në flakë! Humbin jetën 2 persona (VIDEO)

Piloti dhe bashkëpiloti i një avioni privat u vranë të dielën kur avioni i tyre u rrëzua ndërsa po përpiqej të bënte ulje emergjente në Aeroportin Ndërkombëtar La Romana në Republikën Dominikane.

Avioni Gulfstream G200 i regjistruar në SHBA ishte në rrugë për në Austin të Teksasit dhe ndodhej afërsisht 16 milje detare në jugperëndim të La Romanës kur shpalli emergjencë për shkak të problemeve të rënda mekanike.

Ekuipazhi u kthye në aeroport dhe u përpoq të bënte një ulje emergjente, por avioni u rrëzua sapo u ul dhe u përfshi nga flakët, duke shpërthyer në një top zjarri.

Sipas raportimeve paraprake, në bord ndodheshin vetëm dy anëtarë të ekuipazhit.

Instituti Dominikan i Aviacionit Civil (IDAC) dhe Komisioni i Hetimit të Aksidenteve të Aviacionit (CIAA) thanë se po hetojnë incidentin.

“Autoritetet e aviacionit aktivizuan protokollet përkatëse po kryejnë hetimet e nevojshme për të përcaktuar shkaqet e incidentit. Si IDAC ashtu edhe CIAA do të japin informacione shtesë ndërsa hetimi përparon”, sipas një deklarate të ndarë nga IDAC në platformën amerikane të mediave sociale X.

Nuk janë dhënë detaje të mëtejshme rreth aksidentit, dhe autoritetet ende nuk kanë lëshuar një deklaratë zyrtare në lidhje me shkakun e aksidentit.