Avokati: Rama të dëshmojë në Hagë për Hashim Thaçin

Avokati, Tom Gashi thotë se kryeministri Edi Rama duhet të dëshmojë në Hagë për ish-Presidentin e Kosovës, Hashim Thaçi.

Në një intervistë për Euronews Albania, Gashi u shpreh se organet e drejtësisë në Shqipëri duhet të nxjerrin një vendim, ku të thonë që në vend nuk ka pasur trafikim organesh.

“Ne do kishim dashur që të jetë zoti Edi Rama në cilësinë e kryeministrit që është tani, por para se të jetë, ajo është dëshira ime, që të dëshmojë në favor të pjesëtarëve të UÇK-së. Organet kompetente të drejtësisë në Shqipëri duhet të nxjerrin një vendim, që kjo çështje të mbyllet një herë e përgjithmonë, të dihet që nuk ka ndodhur trafikim të organeve njerëzore.

Derisa kjo çështje të mbetet pezull, mendoj se zoti Rama ka kompetenca të tilla që t’i propozojë organeve kompetente. Vetë Shqipëria të nxjerrë një vendim gjyqësor nëse ka ndodhur apo jo. Ne e dimë që nuk ka ndodhur. Do ishte mirë që vetë një nga dëshimtarët të ishte Edi Rama, por edhe ish-kryeministri Pandeli Majko, shefi i SHISH në kohën e luftës”, theksoi ai.

Avokati i ish-presidentit të Kosovës Hashim Thaçi, Gregory Kehoe, i ka dërguar një letër  Kryeprokurorit të Hagës, Jack Smith, ku shprehet se në listën e dëshmitarëve mbrojtës për rastin janë edhe nëntë ish-diplomatë.

Në to përfshihen figura ushtarake të NATO, të OSBE-së, UNMIK-ut e misione të tjera të cilat kanë qenë në Kosovë gjatë kohës së luftës.

Kehoe ka theksuar se edhe një zyrtar i lartë i një shteti fqinj të Kosovës do të dëshmojë.

LEXONI GJITHASHTU

• Avokati i Hashim Thaçit: Nëntë ish-diplomatë të dëshmojnë në Gjykatën Speciale

• Prokuroria ndryshon aktakuzën ndaj Hashim Thaçit
• Majko, Moisiu, Topi dhe Meidani në Hagë, vizitojnë ish-krerët e UÇK-së