Banka Botërore miraton 1 miliard $ për projekte zhvillimi në Irak, Siri dhe Liban

Banka Botërore njoftoi të mërkurën se ka miratuar mbi 1 miliard dollarë (860 milionë euro) për projekte infrastrukturore dhe rindërtimi në Irak, Siri dhe Liban.

Shuma më e madhe e financimit do të shkojë për Irakun, ku janë miratuar 930 milionë dollarë (798 milionë euro) për përmirësimin e infrastrukturës hekurudhore, me qëllim nxitjen e tregtisë së brendshme, krijimin e vendeve të reja të punës dhe diversifikimin e ekonomisë.

Sipas Bankës Botërore, Projekti i Zgjerimit dhe Modernizimit të Hekurudhave të Irakut synon të përmirësojë shërbimet dhe të rrisë kapacitetin e transportit të mallrave ndërmjet Portit Umm Qasr në jug dhe qytetit të Mosulit në veri të vendit.

“Ndërsa Iraku kalon nga rindërtimi në zhvillim, tregtia dhe ndërlidhja e përmirësuar mund të stimulojnë rritjen, të krijojnë vende pune dhe të zvogëlojnë varësinë nga nafta,” deklaroi Jean-Christophe Carret, drejtor i divizionit të Lindjes së Mesme në Bankën Botërore.

Për Sirinë, Banka Botërore miratoi një grant prej 146 milionë dollarësh (125 milionë euro) për të ndihmuar në rivendosjen e energjisë elektrike të qëndrueshme dhe të përballueshme, si dhe për të mbështetur rimëkëmbjen ekonomike të vendit. Projekti i Emergjencës për Energjinë Elektrike synon rehabilitimin e linjave të transmetimit dhe të nënstacioneve të dëmtuara nga lufta.

Muajin e kaluar, Siria nënshkroi një marrëveshje me një konsorcium kompanish nga Katari, Turqia dhe Shtetet e Bashkuara për ndërtimin e një projekti energjetik prej 5,000 megavatësh, me qëllim rigjallërimin e rrjetit të saj elektrik të shkatërruar.

Ndërkohë, për Libanin – që po përpiqet të rimëkëmbet pas luftës 14-mujore midis Hezbollahut dhe Izraelit – Banka Botërore ka miratuar një fond prej 250 milionë dollarësh (214 milionë euro) për riparimin dhe rindërtimin e infrastrukturës publike kritike të dëmtuar dhe të shërbimeve jetike.

LEXONI GJITHASHTU:

• Banka Botërore miraton 250 milionë dollarë për Libanin të goditur nga lufta
• Banka Botërore: Shqipërisë i duhen 20 vite për të hyrë në grupin e vendeve të pasura