Bankat përballuan krizën, Gent Sejko: Presim rritje ekonomike 5% këtë vit 

Izolimi gjatë pandemisë lëkundi ekonominë shqiptare, por masat e marra nga Banka e Shqipërisë të kombinuara me garancitë sovrane, lehtësuan barrën financiare të krizës tek qytetarët dhe biznesi.

Në Komisionin e Ekonomisë, Guvernatori Gent Sejko prezantoi raportin vjetor dhe ndikimin që la kriza e mbylljes.

“Ndikimi i krizës në ekonomi rezultoi më i vogël nga sa pritej, duke dëshmuar si efektin pozitiv të masave të marra nga autoritetet publike, ashtu edhe fleksibilitetin e rezistencën e ekonomisë dhe të sistemit tonë financiar. Parashikimet tona sugjerojnë se ekonomia shqiptare do të shënojë një kthesë drejt rimëkëmbjes gjatë vitit 202”, tha ai.

Guvernatori u shpreh optimist për rimëkëmbje të shpejtë brenda këtij viti, duke parë ecurinë e vaksinimit, por edhe pritshmëritë për një turizëm normal.

 “Ne presim një sezon turistik më të suksesshëm se viti i kaluar, gjithmonë dhe në funksion të vaksinimit masiv të popullatës. Në rast se do të kemi sezon të suksesshëm, sigurisht që ne parashikojmë që ekonomia shqiptare do të ketë një rritje 5%”, shtoi Sejko.

Në raportin vjetor, citohet se tregjet funksionuan normalisht, megjithatë eksportet, konsumi dhe investimet u shoqëruan me rënie.