Bardhi: Kryesia e Kuvendit, vila e Lindita Nikollës blerë me para korrupsioni

Gazment Bardhi ka folur për mediat ndërsa situata tensionohej jashtë godinës së Kryesisë së Kuvendit mes Gardës së Republikës dhe deputetëve të opozitës.

Sipas tij godina është privatizuar dhe nga një pronë shtetërore duket si vila e kryeparlamentares Lindita Nikolla, blerë me paratë e korrupsionit.

“Besoj se aksioni i opozitës qëllimin e vet të parë e ka arritur sot, duke përshfaqur në sytë e gjithë opinionit publik fytyrën e vërtetë të regjimit të Edi Ramës. Deputetët e Kuvendit të Shqipërisë nuk lejohet të marrin pjesë në mbledhjet e tyre të grupit sepse ky është vendimi i regjimit të Edi Ramës. Nuk lejohen të aksesojnë zyrat e tyre në kryesinë e Kuvendit duke e trajtuar kryesinë si vila e Lindita Nikollës e blerë me paratë e korrupsionit,” – u shpreh Bardhi.

Ditën e premte u përjashtuan me 10 ditë nga punimet e Kuvendit deputetët Ervin Salianji, Petrit Doda dhe Edmond Spaho, ndërsa pas seancës me përplasje fizike të 30 tetorit u përjashtuan kreu i grupit Gazment Bardhi, Bledion Nallbati, Edi Paloka, Flamur Noka, Albana Vokshi.

Sot është parashikuar mbajtja e 5 komisioneve parlamentare. Bëhet fjalë për komisionin e Ekonomisë, atë të Ligjeve, Shëndetësisë, Politika e Jashtme dhe Veprimtaria Prodhuese, ku në qendër të diskutimeve do të jetë projekt-buxheti i vitit 2024.

LEXONI GJITHASHTU:

• Noka: Kuvendi është kthyer në burg, kjo është diktaturë staliniste
• Deputetët e përjashtuar hyjnë nga dritaret në Kryesinë e Kuvendit