Bashkëshorti i eurodeputetes italiane gjendet i mbytur me shirit brenda Range Rover

Një ngjarje e rëndë është shënuar në Palermo të Italisë, ku bashkëshorti i eurodeputetes kristiandemokrate Francesca Donato është gjetur i pajetë brenda makinës së tij.

Sipas mediave të huaja, automjeti ‘Range Rover’ ku ndodhej viktima, ishte parkuar pranë një kazerme të braktisur në periferi të Tommaso Natale, në Palermo të Italisë.

Po ashtu mësohet se arkitekti Angelo Onorato, pronar i një dyqani mobiliesh, ishte një sipërmarrës shumë i njohur në qytet.

Biznesmeni është gjetur me një shirit plastik në qafë të shtrënguar fort, me të cilin është mbytur dhe me këmishën me njolla gjaku. Lajmi u bë i ditur pasditen e djeshme rreth orës 15:00 nga bashkëshortja e tij, e cila me të bijën kishin arritur të gjenin pozicionin e makinës me anë të GPS.

Momentalisht janë dy pista hetimi: Ajo e vrasjes dhe ajo e vetëvrasjes. Do të jetë autopsia që do të përcaktojë nëse sipërmarrësi 55 vjeçar ka plagë të tjera apo jo.

Ndërkohë avokati i sipërmarrësit ka dorëzuar në polici një letër që 55 vjeçari kishte lënë disa kohë më parë.

“Angelo më tha: ‘Nëse ndodh diçka, dërgoja këtë letër gruas sime’”, tha avokati, shkruan La Repubblica.

Eurodeputetja e cila është dhe zv.sekretrarja e Kristiano Demokratëve i ka treguar Policisë se kohët e fundit ai ndihej krejtësisht i dëshpëruar.

Ndërkohë një mik në dëshminë e tij ka deklaruar se sipërmarrësi kishte shumë borxhe, por këto pretendime ende nuk janë të verifikuara.

LEXONI GJITHASHTU:

• Turisti polak futet për t’u larë te Liqeni i Tiranës, rrezikon të mbytet
• Gjendet trupi i djalit 3-vjeçar të mbytur në tragjedinë në Bunë