Bashkimi Kurti-Osmani në zgjedhje, Agim Nesho: Lëvizje e zgjuar dhe pragmatiste

Më 14 shkurt qytetarët e Kosovës do t’u drejtohen kutive të votimit për të zgjedhur qeverinë e re. Subjektet partiake prej 3 shkurtit janë në fushatë elektorale, ndërsa në takim me qytetarët kandidatët për kryeministër kanë prezantuar programin dhe synimet e tyre nëse fitojnë zgjedhjet.

Dalja në një listë të përbashkët e Vjosa Osmanit me Lëvizjen Vetëvendosje ka ngjallur kureshtje të shtuar tek votuesit. Por, sa do ndikojë ky bashkim Kurti-Osmani në maksimizimin e votës dhe a rrezikon që në të ardhmen të lindin përplasje mes tyre?

Kjo pjesë ishte një ndër temat, e cila u trajtua në emisionin “Ilva Now” në Euronews Albania të moderuar nga gazetarja Ilva Tare. Ish-ambasadori i Shqipërisë në OKB, Agim Nesho bashkimin e tyre e quajti si një lëvizje të zgjuar dhe pragmatiste.

“Unë mendoj se ndihmon për arsye se ishte lëvizje shumë e zgjuar e VV-së duke pranuar dhe listën e Vjosa Osmanit. E ndihmon edhe VV nga të gjitha paragjykimet e tjera. Është bërë një zgjidhje këtu unë e quaj pragmatiste. Sigurisht e fuqizon rezultatin elektoral të Vetëvendosjes së bashku me listën. Të dy janë personazhe, të cilat kanë luftuar në front të përbashkët për të goditur elitën e vjetër. Janë përputhur të dy”, tha Nesho.

Analisti Agon Maliqi thotë se bashkimi Kurti-Osmani ka krijuar një sinergji në elektorat. Sipas tij, kjo strategji e VV-së do të fitojë terren edhe tek partitë e tjera.

“E krijon një sinergji, dhe ndoshta ky është dallimi me opozitën në Shqipëri. Është krijuar sinergjia. Kurti dhe VV po fitojnë terren edhe tek partitë e tjera, do të tkurren nga pak edhe të tjerat në kurriz të rritjes së VV-së. Jo tkurrje nga militantët, por elektorati më gri dhe sidomos rinia”, shtoi ai.

Gazetarja Jeta Xharra u shpreh se qytetarët e Kosovës kërkojnë që qeveria e re të ketë në përbërje përfaqësim gjinor dhe kualitet të lartë.

“Për ne qytetarët është me rëndësi një lloj kualiteti në kabinet”, tha ajo.