Bayern refuzon ofertën për De Ligt, Manchester United kërkon me ngulm lojtarin

2 vite më parë kushtoi afro 70 milionë euro, duke u bërë një ndër blerjet më të shtrenjta të Bayernit të Mynihut, i cili viteve të fundit ka zhvilluar një merkato jo dhe aq pozitive. Megjithatë Mathias De Ligt ka zhvilluar paraqitje të mira për rekordmenët e Bundesligës, por duket se nuk i ka bindur drejtuesit për t’i garantuar një qëndrim më të gjatë.

Madje tifozët janë të kënaqur me qendërmbrojtësin holandez, ndërsa kërkojnë qëndrimin e tij, por duket se mendimi i tyre nuk do të merret parasysh.

Trajneri Kompany nuk e ka në plan futbollistin, duke i lënë si opsionin e vetëm largimin, me disa skuadra që dëshirojnë ta afrojnë. Manchester United madje ka bërë dhe ofertën e parë zyrtare në drejtim të bavarezëve, 35 milionë euro. Shifër kjo tepër e ulët në krahasim me kualitetet e De Ligt, ndërsa Bayern e refuozi menjëherë.

Djajtë e kuq kanë bindur menaxherin e holandezit me të cilin kanë tashmë akord, por jo me drejtuesit bavarezë të cilët kërkojnë të paktën 50 milionë euro. 24-vjecari De Ligt ka zhvilluar 53 ndeshje me Bayernin e Mynihut në 2 sezone, ndërsa ka arritur të realizojë 5 gola.