BE dhe NATO dënojnë sulmet kibernetike ruse kundër Gjermanisë dhe Çekisë

Bashkimi Evropian dhe NATO kanë denoncuar Rusinë për sulmet kibernetike kundër Gjermanisë dhe Republikës Çeke.

“Fushata keqdashëse kibernetike tregon modelin e vazhdueshëm të sjelljes së papërgjegjshme të Rusisë në hapësirën kibernetike, duke synuar institucionet demokratike, entitetet qeveritare dhe ofruesit e infrastrukturës kritike në të gjithë Bashkimin Evropian dhe më gjerë,” tha në një deklaratë të  premten, Josep Borrell, shefi i politikës së jashtme të bllokut, i cili foli në emër të 27 shteteve anëtare.

“BE nuk do të tolerojë sjellje të tilla keqdashëse, veçanërisht aktivitete që synojnë të degradojnë infrastrukturën tonë kritike, të dobësojnë kohezionin shoqëror dhe të ndikojnë në proceset demokratike,” shtoi ai, duke iu referuar zgjedhjeve të qershorit për Parlamentin Evropian.

Duke përdorur një gjuhë të ngjashme kritike, NATO i bëri thirrje Moskës që të respektojë “detyrimet e saj ndërkombëtare” dhe theksoi se aleanca “do të përdorë aftësitë e nevojshme për të penguar, mbrojtur dhe kundërshtuar spektrin e plotë të kërcënimeve kibernetike”.

Të dy ia vënë fajin APT28, një akronim për Advanced Persistent Threat Act 28, një grup spiunazhi kibernetik i lidhur me shërbimin e inteligjencës ushtarake të Rusisë (GRU).

Në Gjermani, APT28 akuzohet për kompromentimin e llogarive të postës elektronike të anëtarëve të Partisë Social Demokrate (SPD), forca kryesore në koalicionin qeverisës. Berlini tashmë ka thirrur në detyrë të ngarkuarin me punë të ambasadës ruse.

“Kjo është absolutisht e patolerueshme dhe e papranueshme dhe do të ketë pasoja”, tha Ministrja e Jashtme e Gjermanisë, Annalena Baerbock.

Në Republikën Çeke, grupi thuhet se ka shënjestruar disa institucione shtetërore duke shfrytëzuar një “vulnerabilitet të panjohur më parë në Microsoft Outlook”, tha të premten ministria e punëve të jashtme të vendit. Ndërhyrja filloi në vitin 2023, vuri në dukje.

Publikimi i gjetjeve nga të dy vendet nxiti deklaratat denoncuese të BE-së dhe NATO-s, të cilat u publikuan pothuajse njëkohësisht.

LEXONI GJITHASHTU:

• Chelsea triumfon në derbi, “blutë” synojnë zonën europiane
• Gjysmëfinalet e Europa League: Leverkusen drejt finales, 47 ndeshje pa humbje