BE-ja nis hetime ndaj TikTok-ut për ndërhyrje në zgjedhjet rumune

Bashkimi Evropian ka nisur një hetim ndaj platformës TikTok pas dyshimeve se ajo është përdorur nga Rusia për të ndikuar në rezultatin e zgjedhjeve presidenciale në Rumani.

Kandidati i pavarur Calin Georgescu, me prirje miqësore ndaj Moskës, fitoi në raundin e parë më 24 nëntor, duke shkaktuar polemika. Pas akuzave të Këshillit të Sigurisë Kombëtare të Rumanisë për ndërhyrje të një “aktori shtetëror”, Gjykata Kushtetuese anuloi rundin e parë të zgjedhjeve dhe vendosi përsëritjen e tyre.

Presidentja e Komisionit Evropian, Ursula von der Leyen, konfirmoi hetimin ndaj TikTok-ut për shkelje të Aktit për Shërbimet Digjitale, duke kërkuar qasje në të dhënat dhe algoritmet e platformës. TikTok-u tani duhet të sigurojë dhe ruajë të dhëna të lidhura me këtë çështje.

Ndërkohë, senatorë amerikanë kanë dënuar ashpër ndikimin e dyshuar rus, duke e cilësuar atë si pjesë të “luftës hibride” të Vladimir Putinit për të minuar proceset demokratike në Evropë.

LEXONI GJITHASHTU:

• Varësia e të miturve nga Tik Tok, BE mund të ndalojë platformën ‘Tik Tok Lite’
• “Tik Tok të mbyllet”- Prindërit të ndarë për rrjetet sociale: Fajin e ka familja