BE-ja sanksionon grupin paramilitar RSF për mizoritë në Sudan

Bashkimi Evropian njoftoi të enjten miratimin e sanksioneve kundër Abdelrahim Dagalo, komandatit të dytë të Forcave të Mbështetjes së Shpejtë, RSF, të Sudanit, si pjesë e përpjekjeve për t’i mbajtur përgjegjës për mizoritë në vend.

Shefja e politikës së jashtme të BE-së, Kaja Kallas, duke folur për shtypin pas një takimi të Këshillit të Punëve të Jashtme në Bruksel, tha se masa dërgon një “sinjal” se bashkësia ndërkombëtare do të ndjekë penalisht individët përgjegjës për përshkallëzimin e dhunës në Sudan.

“Situata po përkeqësohet ndjeshëm. Kapja e El Fasher nga Forcat e Mbështetjes së Shpejtë hap një tjetër kapitull shkatërrues në këtë luftë. Konflikti ka sjellë mijëra vdekje dhe vuajtje të pafundme”, tha Kallas.

Ajo shtoi se të 27 vendet anëtare të BE-së u kërkuan palëve të rifillojnë negociatat drejt një armëpushimi të menjëhershëm dhe të qëndrueshëm.

Kallas gjithashtu përshëndeti përpjekjet ndërkombëtare për paqe, përfshirë ato të SHBA-së, që synojnë ndalimin e vuajtjeve të vazhdueshme njerëzore në Sudan.

Më vete, blloku dënoi në një deklaratë aktet e kryera nga RSF-ja, duke përfshirë shënjestrimin e qëllimshëm të civilëve, vrasjet etnike, dhunën seksuale dhe atë me bazë gjinore, si dhe mohimin e aksesit humanitar.

Një luftë civile midis ushtrisë sudaneze dhe RSF-së vazhdon që nga prilli i vitit 2023, duke çuar në mijëra vdekje, migrim të detyruar dhe uri.

LEXONI GJITHASHTU:

• OKB jep alarmin: Kriza e urisë në Gaza dhe Sudan po përkeqësohet
• RSF sulm me dron në një funeral në Sudan, humbin jetën 40 persona