BE në qendër të kritikave para samitit të klimës COP30

Roli i Bashkimit Evropian në bisedimet përgatitore për COP30 është përshkruar si “zhgënjyes” nga ekspertët.

BE vendosi të mos paraqesë NDC e tij të re, Kontributin e Përcaktuar Kombëtar,  përpara samitit të klimës.

NDC-të  përshkruajnë planin e çdo vendi për të ulur emëtimet e gazeve serrë dhe për t’u përshtatur me ndryshimet klimatike, në përputhje me Marrëveshjen e Parisit. Ato zakonisht përditësohen dhe dorëzohen paraprakisht, për të lejuar më shumë kohë për analizë dhe diskutim.

“Kishte një pritshmëri nga presidenca braziliane e COP–it që më shumë NDC të paraqiteshin gjatë takimit përgatitor. Disa u dorëzuan, por pati edhe mungesa të dukshme veçanërisht nga Evropa. Ne nuk mund ta zgjidhim ekuacionin klimatik të planetit me vetëm disa vende. Ose të gjithë bëhen pjesë e lojës, ose nuk do të mund ta zgjidhim problemin”, theksoi  André Guimarães, Drejtor Ekzekutiv, Instituti i Kërkimeve Mjedisore të Amazonës (IPAM).

Në një intervistë për Euronews, drejtori ekzekutiv i IPAM–it kritikoi qëndrimin e BE-së, duke thënë se u kufizua vetëm në publikimin e një deklarate. Udhëheqësit evropianë kanë premtuar se do ta prezantojnë planin e ri gjatë COP30, duke këmbëngulur se vendet anëtare mbeten në rrugën e duhur për të përmbushur objektivat e reduktimit të emetimeve.

“Mendoj se, pavarësisht gjithë pasigurisë, bota duhet të vazhdojë përpara. Ndryshimet klimatike nuk do të ndalojnë dhe nuk do të presin që lufta të mbarojë apo që tarifat tregtare të zgjidhen, përpara se të tregojnë fuqinë e tyre. Forca e tyre është tashmë e dukshme — në zjarre, thatësira, përmbytje dhe në pasigurinë e rritur për investitorët”, shtoi Drejtori Ekzekutiv i IPAM-it.

Këtë javë, Kombet e Bashkuara publikuan një raport që vlerëson 64 NDC të dorëzuara deri në shtator. Edhe pa kontributin e përditësuar të BE-së, gjetjet sugjerojnë se emëtimet globale ka gjasa të arrijnë kulmin para vitit 2030 dhe të fillojnë të bien deri në vitin 2035. Samiti COP30 do të nisë më 10 nëntor në Belém do Pará, Brazil.