BE propozim të ri për karikuesët e telefonave

Komisioni Europian po planifikon të propozojë një projektligj për krijimin e një karikuesi universal për të gjitha pajisjet ‘mobile’.

Brukseli u kërkon të gjithë prodhuesve të përdorin një pajisje karikimi universale USB-C dhe t’i bëjnë protokollet e softuerëve të karikimit të ndërveprueshëm midis markave e pajisjeve.

Zyrtarët e Komisionit Evropian kanë cilësuar se rregullat e reja që planifikohen do të zbatohen edhe për tabletët, kufjet, kamerat dhe altoparlantët.

Në bazë të propozimit, gjigandi i teknologjisë ‘Apple’ duhet të modifikojë sistemin aktual të kabllove Lightning që ka prodhuar dhe po përdor për pajisjet e saj të smartphone-ve.

Një nismë e tillë nga Komisioni Evropian po bëhet për të reduktuar mbeturinat elektronike.

Disa nga prodhuesit kryesorë të smartphone-ve në botë, si Samsung, Xiaomi apo Huawei kanë adoptuar portën e gjeneratës së re prej disa vitesh, duke u krijuar mundësinë konsumatorëve të karikojnë pajisjet e tyre me të njëjtët aksesorë.

Sidoqoftë, e ardhmja e rikarikimit të telefonave është gjithnjë e më shumë pa kabllo. Për shembull telefonat Android apo Apple, janë me rikarikim wireless.