Studiuesi i njohur pogradecar Ledjan Zeqollari ka siguruar dy foto të Benito Musolinit gjatë vizitës në fshatin Zemçë të Mokrës, gjatë frontit të luftës Italo-greke në vitin 1941.
Sipas historianit, diktatori italian në Mars të 41-shit ka vizituar pothuajse gjithë forcat e ushtrisë italiane të përqendruara në luftën greke nga Ohri deri në Himarë.
“Vizita e Benito Musolinit u bë në kuadër të luftës Italo-greke gjatë luftës së dytë botërore. U bë kryesisht për inspektimin e frontit Italo-grek. Deri në atë periudhë punët nuk po shkonin mirë përsa i përket raportit të luftimeve për ushtrinë italiane, kishte mjaft humbje dhe në 2 Mars të vitit 1941 vet Benito Musolini e inspektoi këtë front, me qëllimin e vetëm për të ngritur moralin e ushtrisë italiane. Këtë ne e gjejmë te faktuar në dy foto të cilët unë i kam siguruar , të cilat dëshmojnë vizitën e Musolinit në 18 Mars 1941 në fshatin Zëmçë”,-tha Ledjan Zeqollari, historian.
Reshat Isallari, banor i fshatit Zemçë tregon se forcat italiane që ndodheshin në fshatin e tij i kanë kërkuar familjes Isallari të lironte banesën e tyre për disa ditë pasi aty do të qëndronte Benito Musolini.
Reshat Isallari, banor i fshatit Zemçë
“Në Mars të 41 ka ardhur një kompani ushtarësh në familjen tonë dhe u ka thënë familjes, ishte një shtëpi dykatëshe, i ka thënë se do largoheshin për disa muaj sepse do vendosemi neve këtu. Pas një jave erdhi Musolini dhe një dhomë e kanë rregulluar për të. E rregulluan vet italianët. Sot kjo banesë nuk ekziston, është prishur në vitet 1975”
Studiuesi Ledjan Zeqollari bën me dije se vizita e Musolinit në Mokër dhe në Lin ka zgjatur afro 20 ditë.
LEXONI GJITHASHTU:
- Pse e mori Musolini ‘shpatën e Muslimanëve’?
- Kërkesa e të djathtëve për të ‘rikthyer’ Musolinin nxit tensione politike në Itali