Berisha: Në raportin e DASH flitet për narkoekonomi ku nuk ka asnjë investim të huaj

Kreu i Partisë Demokratike, Sali Berisha, mbajti këtë të hënë një konferencë me gazetarët ku vijoi akuzat ndaj maxhorancës qeverisëse. Berisha u ndal te raporti i DASH për Shqipërinë, për të cilin tha se evidenton shndërrimin e Shqipërisë në një parajsë për të legalizuar paratë e drogës. Shefi i opozitës shtoi se në raportin e DASH flitet për një narkoekonomi ku nuk ka asnjë investim të huaj.

“Shqipëria është shndërruar nga Edi Rama në parajsën e larjes së parave të klaneve dhe karteleve më të rrezikshme në Europë. Departamenti i Shtetit në raportin e fundit flet hapur për një patern ekonomik që po zhvillohet dhe që në të vërtetë është patern ekonomik i narkoshtetit dhe i narkoekonomisë. Në Shqipëri nuk ka investime të huaja. Ka dhjetë vite që nuk numërohen as më gishta investitorët seriozë perëndimorë, sepse ata janë zëvendësuar nga narkotrafikantët dhe paratë e tyre. Sepse janë terroristët e karteleve të drogës ata që dominojnë tërësisht tregun shqiptar, ata që kanë shkatërruar tërësisht konkurrencën, ata të cilët janë më të preferuarit apo që i diktojnë Edi Ramës.

Ndaj me të drejtë në raport flitet për një korrupsion të madh qeveritar, korrupsion të madh në gjyqësor. Flitet për paratë e drogës, për mungesën e investimeve të huaja, që të gjitha këto janë tipike për një narkoshtet. Rikujtoj këtu se kompani të mëdha botërore, gjatë këtyre viteve, u larguan nga Shqipëria. Rikujtoj këtu se të gjitha akset e mëdha rrugore, nga Hani i Hotit në Gjirokastër, u ndërtuan nga kompani ndërkombëtare me reputacion të madh. Rikujtoj këtu se zbarkuan në Shqipëri gjigantë si Shell, pavarësisht rezultatit, por shpenzoi mbi 1 miliard euro në shpatet e Shpiragut dhe zona të tjera në kërkim të naftës. Kompani të tjera në real estate kishin projekte mbi 1.5 miliardë euro dhe ato u larguan të gjitha nga Shqipëria, sepse u zëvendësuan nga kartelet e drogës.

Partia Demokratike do të vazhdojë misionin e saj të transparencës së plotë, pavarësisht avoketërve të narkoshtetit, pavarësisht çfarë pozicioni kanë dhe ku ndodhen, me bindjen e plotë se narkoshteti shqiptar është rrezik madhor për qytetarët shqiptarë, për qytetarët e rajonit, për Bashkimin Evropian dhe partnerët tanë përtej Atlantikut,” tha Berisha.

LEXONI GJITHASHTU:

• A është Edlira Çepani kandidatja për Tiranën? Berisha: Kam ngritur grup pune për…
• Berisha: Do bëjmë padi në SPAK për “Aruba-n”, Rama të japë dorëheqjen