Berisha tryezë pune me ekspertë dhe pedagogë, uron 7 Marsin

Kreu i Partisë Demokratike, Sali Berisha këtë të shtunë ka zhvilluar një tryezë pune me ekspertë e pedagogë në kuadër të festës së 7 marsit. Berisha gjatë fjalës së tij ka uruar mësuesit dhe pedagogët teksa i ka cilësuar si misionarë të së vërtetës.

Ai theksoi se misioni i tyre është i rëndësishëm për të ardhmen e kombit. Berisha gjithashtu theksoi se arsimi në vend është në krizë.

“Së pari dëshiroj që nga ky takim t’u përcjellim urimet më të përzemërta të gjithë mësueseve dhe mësuesve, pedagogeve dhe pedagogëve, të gjithë mësuesve të sistemit parashkollor, në këtë ditë që mbarë kombi nderon mësuesin misionar si një misionar të tij të vërtetë.

Misioni i tyre, misioni juaj është i një rëndësie përcaktuese më shumë se çdo mision tjetër për të ardhmen e një kombi. Ne vijmë sot në këtë ditë në kushtet e një krize të jashtëzakonshme të sistemit arsimor, të një rrokullisje të këtij sistemi shumë më të madhe se ajo që shohim në rrugë dhe urat e ndërtuara nga kjo qeveri.

Ju bëtë diskutime shumë të përgjegjshme dhe u falenderoj shumë për ekspozetë që bëtë, por në rast se përpiqemi të kuptojmë shkaqet e kësaj gjendje katastrofale në arsim ato janë të mirëfillta antikombëtare.

Dhe është naivitet në qoftë se ne nuk i vlerësojmë të tilla. Nuk mund të ketë akt më antikombëtar se sa të bllokosh me një urdhër doktoraturat në universitete”, tha ai ndër të tjera.