Bernardeschi me COVID-19, shtohet lista e futbollistëve të infektuar pas ndeshjeve me Italinë

Përfundimisht grumbullimi i përfaqësueses italiane të futbollit javën e fundit të muajit mars ka rezultuar në një vatër infektimi nga COVID-19.

Ditën e sotme futbollisti Federico Bernardeschi, i Juventusit, u konfirmua pozitiv me COVID-19 duke u bërë lojtari i gjashtë në radhë që preket nga virusi pas Leonardo Bonuccit (Juventus), Maro Verrattit (PSG), Alessandro Florenzi (PSG), Vincenzo Grifo (Freiburg) dhe Alessio Cragno (Cagliari).

Dhjetë ditët e fundit Federata Italiane e Futbollit ka raportuar për të paktën 15 persona të prekur nga COVID-19, prej të cilëve gjysma zyrtarë dhe anëtarë të stafeve teknike.

Mungesa e Bernardeschit shton problemet për trajnerin e Juventusit Andrea Pirlo, i cili në përballjen me Napolin nuk do të ketë në dispozicion as Bonuccin, pasi të dy lojtarët janë detyruar të vihen në izolim.

Ngjashëm situata e vështirë paraqitet edhe për PSG-në e Mauricio Pochettinos, që ka në Champions League përballjen me Bayern Munich, por do të duhet ta luajë pa Verratin dhe Florenzin.

Gjithashtu shqetësuese duket gjendja edhe për ekipet e tjera, të cilat kanë pasur lojtarë të grumbulluar me Italinë dhe kanë marrë masa që t’i shmangin në ndeshjet e parashikuara këto ditë.

Një masë të ngjashme ndërmori Sassuolo që kundër Romës këtë fundjavë, ku la jashtë grupit Gian Marco Ferrarin, Manuel Locatellin, Berrardin dhe Francesco Caputon.

LEXONI GJITHASHTU:

• Çerekfinalet e Champions League, Liverpool e Manchester City përballë Real Madrid e Dortmund
• Itali, pas Bonuccit dhe Verrattit edhe Florenzi me COVID-19
• La Liga, ndaj Valladolid Barcelonës i mjafton Dembele, tashmë Atletico vetëm një pikë larg
• Koreja e Veriut bojkoton Lojërat Olimpike të Tokios