Betohet qeveria holandeze, Rutte nis mandatin e katërt

Qeveria e kryeministrit Mark Rutte u betua të hënën për mandatin e katërt rresht të saj, përpara mbretit të Holandës, thuajse 10 muaj nga mbajtja e zgjedhjeve të fundit të përgjithshme.

Mbreti priti shumicën e anëtarëve të qeverisë së re në pallatin mbretëror në Hagë, ku ata pozuan për foton tradicionale tek shkallët e tij.

Ministrja e re e Financave, Sigrid Kaag mungoi në ceremoninë e përurimit pasi rezultoi pozitive në testin për coronavirus.

Edhe pse koalicioni qeverisës përbëhet nga të njëjtat 4 parti që kanë qenë në pushtet që prej 2017-s, u desh një kohë rekord prej 300 ditësh që ato të bashkoheshin sërish, pas zgjedhjeve të 17 marsit, të cilat bënë që subjektet politike të ngurronin për të bërë kompromis.

“Është tipike holandeze. Partitë nuk marrin një vendim të prerë, duan të negociojnë me të gjithë, çdo opinion duhet të pranohet nga qeveria. Ndaj ky është një cirk që nuk ofron një zgjidhje reale për problemet. Ky vend ka shumë probleme, sikurse çdo vend tjetër i Evropës”, thotw Kees Boonman, analist politik, Holandë.

Betimi i ekzekutivit vjen në një kohë kur në Holandë janë rritur infektimet me Omicron, pavarësisht bllokadës së gjerë që mban mbyllur vendet publike që prej dhjetorit.