English

Biden dhe Trump intensifikojnë fushatën në shtetin e Pensilvanisë

KOMENTE

SHPERNDAJE
ARTIKULLIN

Text sizeAa Aa

Pensilvania është një nga disa shtete amerikane që mund të ketë rol përcaktues në rezultatin e zgjedhjeve presidenciale të nëntorit.

- Advertisement -

Siç njofton korrespondenti i Zërit të Amerikës Scott Stearns, ekipet e fushatave të Presidentit Joe Biden dhe ish Presidentit Donald Trump po intensifikojnë përpjekjet për të siguruar mbështetjen e duhur për fitore në këtë shtet kyç në zgjedhjet e 5 nëntorit.

Pensilvania është një shtet i madh, i ndarë politikisht, i konsideruar si ndër shtetet që mund të përcaktojnë fatin e zgjedhjeve të këtij viti.

Michael Sances është profesor i shkencave politike në Universitetin Temple të Pensilvanisë.

“Shteti votoi për zotin Trump në 2016 dhe për zotin Biden në 2020. Në të dyja zgjedhjet dallimi ishte me 40 mijë dhe 80 mijë vota në një shtet me miliona votues. Ne jemi të ndarë.”

Profesor Sances thotë se shqetësimet kryesore të votuesve në Pensilvani janë ekonomia dhe emigracioni.

“Mbështetësit e zotit Biden po përpiqen të nxjerrin në pah zhvillimet pozitive në fushën ekonomisë. Kjo ende nuk është pranuar nga publiku i gjerë, që është shumë i shqetësuar nga problemet ekonomike. Njerëzit janë të shqetësuar për emigracionin dhe kufirin jugor, edhe pse Pensilvania ndodhet larg kufirit jugor të vendit”, thotë ai.

Ekipi i fushatës së zotit Trump në Pensilvani po sulmon politikat kufitare të Presidentit Biden dhe nismat e tij të energjisë së pastër.

“Mendoni për çështjet me të cilat po përballemi tani, problemet në kufirin jugor, mungesë të pavarësisë energjetike, rregullat për të makinat elektrike. Kush dëshiron të blejë makina elektrike gjatë gjithë jetës?”, tha zoti Trump gjatë një tubimi elektoral.

Automjetet elektrike dhe importet kineze janë çështje të rëndësishme në një shtet ku anëtarët e sindikatave janë politikisht aktivë dhe të organizuar.

Presidenti Biden këtë muaj katërfishoi tarifat e importit për automjetet elektrike kineze, duke thënë se konkurrenca e pandershme po dëmton punëtorët amerikanë.

“Unë jam i vendosur që automjetet elektrike në të ardhmen të prodhohen në Amerikë nga punëtorë të mbështetur nga sindikatat”, tha ai.

Në një takim me pronarë armësh në Pensilvani, zoti Trump kritikoi karakterin e rivalit të tij Joe Biden.

“Joe Biden është presidenti më i keq, më i paaftë dhe më i korruptuar në historinë e vendit tonë”, tha ai.

Zoti Biden ka lindur në qytetin Skrantën të Pensilvanisë dhe në fushatë ai shpesh thekson lidhjet e tij me klasën punëtore të këtij shteti, duke e portretizuar zotin Trump si një njeri që “përulet para miliarderëve”.

“Ne të gjithë kemi njohur njerëz të tillë. Vizioni im për Amerikën është ai i shpresës dhe i mundësive. Është një vështrim nga Skrantëni, nga amerikanët e klasës punëtore si ju”, tha ai.

Nënpresidentja Kamala Harris bëri fushatë në Pensilvani këtë javë, vizita e saj e katërt atje këtë vit.

“Ne besojmë në premtimin e Amerikës për liri, barazi, mundësi dhe drejtësi, jo vetëm për disa, por për të gjithë.”

Ajo tha se votuesit e Pensilvanisë nuk duhet të mashtrohen nga zoti Trump dhe aleatët e tij.

“Në këtë moment, ekstremistët po përpiqen ta përçajnë vendin tonë. Ne i shohim ata se si inkurajojnë ksenofobinë dhe urrejtjen”, tha ajo.

Zoti Trump u tha votuesve në Pensilvani se ai do të rikthejë pozicionin e fortë të Amerikës në botë.

“Ne do të rikthejmë forcën amerikane në vend. Katër vjet më parë, ne respektoheshim në të gjithë botën. Sot konsiderohemi si shaka. Kjo nuk do të zgjasë për shumë kohë”, tha ai, shkruan VOA.

Një sondazh i gazetës The Philadelphia Inquirer këtë muaj tregon se zoti Biden dhe zoti Trump kanë mbështetje pothuajse të barabartë në Pensilvani, ku zoti Biden ka një mbështetje më të ulët nga votuesit e rinj dhe ata me ngjyrë krahasuar me katër vjet më parë. Të dyja këto grupe votuesish ishin thelbësore në fitoren e zotit Biden në këtë shtet në vitin 2020.

LEXONI GJITHASHTU:

LEAVE A REPLY

Please enter your comment!
Please enter your name here

Etiketimet

TË FUNDIT

Sondazh

Euro 2024| A mendoni se Shqipëria do të mund ta kalojë grupin e “ferrit” në kampionatin Evropian?