Biden lejon Ukrainën të godasë territorin rus, Moska kërcënon me armë bërthamore

Dmitry Medvedev, nënkryetar i Këshillit të Sigurimit të Rusisë, ka reaguar ndaj vendimit të Joe Biden për të lehtësuar kufizimet mbi përdorimin e ndihmës ushtarake për Ukrainën. Medvedev tha se përdorimi i armëve me rreze të gjatë brenda Rusisë do të konsiderohej si pjesëmarrje e NATO-s në luftë.

Ai theksoi se veprime të tilla mund të bëhen shkak për luftë dhe paralajmëroi Perëndimin se do të ishte një gabim fatal të mendohej se Rusia nuk është e gatshme të përdorë armë bërthamore taktike kundër Ukrainës. Ai sugjeroi gjithashtu mundësinë e goditjes së vendeve armike me armë bërthamore strategjike.

“Konflikti aktual me Perëndimin po zhvillohet sipas skenarit më të keq të mundshëm”, tha Medvedev.

Diplomatët analizojnë se kërcënimet e politikanit rus pasqyrojnë mendimet në kupolën më të lartë të Kremlinit.

Ndërkohë, një institut kërkimor i mbështetur nga Putin sugjeroi se Rusia duhet të konsiderojë një shpërthim bërthamor “demonstrativ” për të trembur Ukrainën nga përdorimi i armëve perëndimore brenda territorit të saj.

Kujtojmë se këtë të premte Presidenti amerikan Joe Biden i ka dhënë dritën jeshile Ukrainës që të përdorë armë të furnizuara nga Shtetet e Bashkuara për të goditur objektiva në Rusi, por vetëm me qëllimin për të mbrojtur Kharkivin.

LEXONI GJITHASHTU:

• SHBA lejon Ukrainën të godasë disa objektiva në Rusi me armatime amerikane
• Kremlini: Ukraina po përpiqet të godasë brenda Rusisë me armë amerikane