Biden në Hawaii pas zjarreve, premton mbështetje për banorët dhe rindërtimin

Presidenti Joe Biden u tha të mbijetuarve të zjarreve në Hauai se shteti “vajton me ju” dhe premtoi ndihmë që Maui të rikuperohet pas zjarreve më fatale të rëna në Shtetet e Bashkuara në më shumë se një shekull.

Presidenti dhe bashkëshortja bënë një tur gjatë pushimeve të tyre njëjavore për të qetësuar të mbijetuarit nga zjarret. Lahaina ishte një qytet historik me 13 mijë banorë, por është shkrumbuar i tëri nga flakët.

“Dua që ta dini se i gjithë vendi vajton me ju, qëndron pranë jush dhe do të bëjë gjithçka që është e mundur që të rikuperoheni dhe rindërtoheni, në respekt të kulturës dhe traditave tuaja”, tha Biden.

Zjarret masive kanë marrë të paktën 114 jetë njerëzish, ndërkohë që 850 të tjerë konsiderohen ende të humbur. Flakët u përhapën me shpejtësi të madhe saqë vendasit dhe turistët mbetën të bllokuar në rrugë, ose u hodhën në oqean për të shpëtuar.

Janë bërë thuajse 2 javë që nga rënia e zjarreve dhe Biden është gjendur nën një breshëri kritikash nga republikanët, që e akuzojnë se nuk ka bërë sa duhet për të përmirësuar situatën.

Nga ana e saj, Shtëpia e Bardhë ka deklaruar se presidenti e shtyu vizitën për të mos shpërqendruar grupet e punës që janë të angazhuara në terren.