Biden: Xi, një diktator. Reagon Pekini: Deklaratat e SHBA të papërgjegjshme

Joe Biden e ka quajtur homologun kinez Xi Jinping një diktator, gjatë një eventi për mbledhjen e fondeve elektorale në Kaliforni, ku ka komentuar rastin e balonave-spiune në qiejt amerikanë.

“Motivi për të cilin Xi Jinping u inatos shumë kur rrëzova këto balona të mbushura me pajisje spiunazhi ishte sepse ai as që e dinte që ky mjet ishte aty”, tha Biden.

Deklarata e tij vjen pak ditë pas vizitës së sekretarit të Shtetit, Antony Blinken në Pekin. Ky i fundit është shprehur i zhgënjyer nga ky qëndrim.

“Deklaratat e palës amerikane ishin qesharake dhe të papërgjegjshme. Ato kanë dëmtuar seriozisht protokollin diplomatik dhe kanë fyer dinjitetin politik të Kinës. Gjithçka ishte një provokim i hapur. Kina është shumë e pakënaqur dhe e kundërshton këtë qasje”, u shpreh Mao Ning, zëdhënëse e Ministrisë së Jashtme kineze.

Balona-spiune, për të cilën Kina deklaroi se ishte për monitorimin e motit, depërtoi në Shtetet e Bashkuara para se të rrëzohej nga ushtria amerikane në shkurt.

Asokohe, Uashingtoni deklaroi se objekti kishte qenë pjesë e një programi kinez për mbledhjen e informacioneve.