Bie inflacioni në Eurozonë, GDP u rrit me 0.3 për qind në tremujorin e dytë të 2023

Ekonomia e Evropës po tregon shenja rikuperimi, sipas të dhënave të publikuara të hënën nga zyra evropiane e statistikave, EUROSTAT.

Konkretisht, inflacioni në zonën Euro ra në 5.3 për qind në korrik, niveli i tij më i ulët që prej janarit 2022 dhe nga 5.5 për qind që ishte në qershor.

Por inflacioni bazë, që ofron një vlerësim më të saktë lidhur me presionin ndaj çmimeve, mbeti i pandryshuar në 5.5%.

Rënia e inflacionit është në linjë me parashikimet e mëparshme ekonomike, por sërish mbetet shumë më sipër objektivit prej 2 për qind të caktuar nga Banka Qendrore Evropiane.

Javën e kaluar, BQE rriti normat e interesit për herën e nëntë rresht, duke i çuar në nivelin më të lartë në 23 vjet, në përpjekje për të vendosur inflacionin nën kontroll.

Ndërkohë, të dhënat e reja tregojnë se ekonomia e Eurozonës u rrit me 0.3 për qind në tremujorin e dytë të vitit, më shumë nga sa parashikohej. Ndërsa GDP-ja në bllokun me 27 vende anëtare mbeti e qëndrueshme.

Gjermania, e konsideruar si fuqia kryesore ekonomike e Unionit, duket se ka dalë nga recesioni pasi nuk ka pasur rënie, edhe pse rritja e saj ekonomike ka qenë zero për qind.

LEXONI GJITHASHTU:

• Bie inflacioni në eurozonë, nuk preken çmimet e ushqimeve dhe shërbimeve
• Hyrja e Kroacisë në eurozonë, Macron uron në gjuhën kroate