“Bisedë e dobishme”, Çfarë u deklarua pas bisedës së Putin dhe Trump

Presidenti rus Vladimir Putin dhe homologu i tij amerikan Donald Trump zhvilluan një bisedë telefonike që zgjati më shumë se dy orë dhe u cilësua nga të dyja palët si “shumë përmbajtjesore, sinqertë dhe konstruktive”.

Kreu i Kremlinit tha se telefonata shënoi një hap pozitiv drejt rifillimit të dialogut për paqe midis Rusisë dhe Ukrainës, ndërsa theksoi gatishmërinë e Moskës për të punuar mbi një memorandum për një marrëveshje paqeje të ardhshme.

Putin falënderoi Trump për mbështetjen e SHBA-së në rifillimin e negociatave të drejtpërdrejta mes Moskës dhe Kievit, duke përmendur se bisedimet e fundit në Stamboll japin arsye për optimizëm:

“Rusia është e gatshme të punojë me Ukrainën për një marrëveshje që do të përfshinte parimet e zgjidhjes së konfliktit, afatet për një traktat paqeje dhe kushtet për një armëpushim të përkohshëm, nëse arrihet dakordësi.”

Trump, nga ana e tij, tha se beson në një zgjidhje paqësore dhe se është i përkushtuar për të ndihmuar në identifikimin e rrugës më efektive drejt përfundimit të luftës. Sipas burimeve zyrtare, gjatë bisedës së gjatë, udhëheqësit i janë drejtuar njëri-tjetrit me emër dhe kanë nisur telefonatën me urimet e Putinit për lindjen e nipit të njëmbëdhjetë të Trump.

Në mënyrë të veçantë, nuk u diskutua një afat konkret për arritjen e armëpushimit, por Trump nënvizoi dëshirën për të avancuar sa më shpejt në drejtim të paqes.

Gjithashtu, biseda përfshiu çështjen e mundshme të një shkëmbimi të ri të të burgosurve mes Rusisë dhe SHBA-së, ku përmendet një marrëveshje në shqyrtim për një shkëmbim në përmasat “nëntë për nëntë”.

Presidentët trajtuan edhe marrëdhëniet dypalëshe, duke shprehur gatishmëri për normalizimin e mëtejshëm të tyre. Trump deklaroi se e sheh Rusinë si një nga partnerët më të rëndësishëm ekonomikë dhe tregtarë të Amerikës.

Në planin ndërkombëtar, një tjetër temë diskutimi ishte procesi i negociatave të ndërmjetësuara nga Omani midis Uashingtonit dhe Teheranit për programin bërthamor iranian. Putin e vlerësoi pozitivisht këtë përpjekje, duke e cilësuar si një zhvillim të rëndësishëm për sigurinë rajonale.

Zëdhënësi i Kremlinit, Dmitry Peskov, dhe këshilltari Yury Ushakov pritet të japin më shumë detaje rreth kësaj bisede në vijim. Biseda e fundit shënon kontaktin e tretë telefonik mes dy liderëve që nga rikthimi i Trump në Shtëpinë e Bardhë. Të dy ranë dakord për të mbajtur komunikimin të hapur dhe për të vazhduar dialogun për të gjitha çështjet e ngritura, veçanërisht për krizën në Ukrainë.

LEXONI GJITHASHTU:

• Rubio: SHBA-ja është për paqe, Europa po mbështet luftën
• “Jemi më të fortë…”, Biden reagon pas mbështetjes nga liderët botërorë