Sekretari amerikan i Shtetit Antony Blinken ka mbërritur në Arabinë Saudite për vizitën e tij të pestë në Lindjen e Mesme që nga fillimi i konfliktit midis Izraelit dhe Hamasit më 7 tetor të vitit të kaluar.

Lajmin e kanë bërë të ditur mediat e huaja, sipas të cilave, ka diskutime serioze për një tjetër armëpushim të mundshëm në konfliktin e Gazës, me palët që presin aktualisht një përgjigje nga Hamasi për projekt-propozimin.

Për kornizën e marrëveshjes u ra dakord nga shefat e inteligjencës së Shteteve të Bashkuara, Katarit, Izraelit dhe Egjiptit.

Raportet thonë se armëpushimi është i strukturuar në të paktën tre faza. Secila prej tyre do të përfshinte lirimin e pengjeve izraelitë të mbajtur në Gaza dhe të burgosurve palestinezë të mbajtur në Izrael.

Por ky armëpushim ende nuk e detyron Izraelin t’i japë fund luftës së tij me Hamasin. Kjo është një pikë kyçe, sepse grupi militant palestinez po kërkon që armëpushimi të çojë në një armëpushim të përhershëm.

Më e rëndësishmja, ndërprerja e armiqësive do të lejonte një rritje të madhe të ndihmës humanitare për Gazën, për të cilën OKB thotë se është në rrezik nga uria.

Nëse Hamasi pranon të fillojë ndërtimin e kornizës për marrëveshjen, do të ketë ende shumë detaje për të zgjidhur.

Dhe gjithashtu marrëveshja do të duhej të miratohej nga kabineti i sigurisë i Izraelit, ku anëtarët e ekstremit të djathtë i kanë kundërshtuar kushtet.

LEXONI GJITHASHTU:

• Palestinezët shpresojnë se vizita e Blinken mund të sjellë armëpushim në Gaza
• Katastrofë humanitare në Gaza, OKB bën thirrje për lëvrimin e financimeve