Bisedimet SHBA-Iran, analisti: Mungon besimi mes palëve, situata mbetet e brishtë

I ftuar në një lidhje live për emisionin “Balkan Talks” në Euronews, analisti politik Melazim Koci foli për zhvillimet më të fundit në Lindjen e Mesme.

Ai theksoi se dinamika aktuale e situatës nuk është në favor të Izraelit, ndërsa shtoi se situata mbetet e brishtë, me mungesë besimi mes palëve dhe me një mundësi të ulët për një epilog pozitiv të bisedimeve aktuale.

Ai shtoi se, nëse nuk arrihet një marrëveshje, programet bërthamore dhe ato të dronëve të Iranit do të mbeten aktive, gjë që sipas tij e bën situatën të papranueshme për Izraelin.

“Kjo paqe në thonjëza nuk është në favorin e Izraelit. Nëse mbetet ky pozicion, madje edhe nëse hapet Ngushtica e Hormuzit, ky do të jetë një pozicion jo i favorshëm për Izraelin, sepse dy objektivat kyçe do të mbeten të paprekura sa i përket Izraelit. Pra programi bërthamor do të mbetej i paprekur. Nëse nuk do të ketë marrëveshje dhe unë thjesht druaj, dyshoj që do të ketë. Dhe e dyta programi balistik dhe i dronëve ende funksionon. Unë nuk besoj në rezultat pozitiv të bisedimeve iraniano-amerikane. Mendoj që për shkak të pozicionimit të drejtë neutral të Brukselit, të Bashkimit Evropian si tërësi, ndërhyrja e tyre do të ishte ndihmuese, sepse në njërën anë do të ishte presion diplomatik i nivelit të lartë mbi Teheranin. Dhe e dyta, nuk besoj që Teherani me lehtësi do të mund të refuzonte një gjë të tillë, sepse Bashkimi Evropian ka pasur siç e dini pozicion shumë neutral”, tha ai.