Blendi Klosi prezantohet si drejtues politik i PS-së në Vlorë, zëvendëson Ahmetajn

Ish-ministri i Turizmit dhe Mjedisit, Blendi Klosi është prezantuar këtë të martë si drejtuesi politik i Partisë Socialiste për qarkun e Vlorës, pas largimit të Arben Ahmetajt nga ky post.

Edhe pse ishte lajmëruar se në prezantim do të ishte dhe Ahmetaj, ky i fundit ka munguar.

Lidhur me mungesën e Arben Ahmetajt në Vlorë, deputeti Damian Gjiknuri tha se për këtë është përgjigjur edhe kryeministri Edi Rama.

“Janë lëvizje normale para fushatave zgjedhore, ku secili lojtar pozicionohet në vendin e tij në mënyrë që skuadra të japë maksimumin e vet. Ahmetaj është lajmëruar, por mesa di, ka qenë i angazhuar me punë të tjera”, u shpreh Gjiknuri.

Në mbledhje, mungoi kryebashkiaku Dritan Leli, teksa Klosi shtoi se Partia Socialiste ka detyrë që të jetë bashkë me qytetarët.

“Mos u përpiqni të ndani popullin. Vlerësimi për gjithësecilin bëhet si u shërben qytetarëve. Shumë shpejt do të fillojmë procedurat për punën e kryetarëve të bashkive në të gjithë vendin”, theksoi ai.

Klosi ka qenë edhe më parë drejtues politik në Vlorë, në vitet 2007-2009.

LEXONI GJITHASHTU

• Deputeti i PD-së: Mjeku Alimehmeti do ishte kandidat i duhur për Bashkinë e Tiranës
• Rama-peshkatarëve: Brenda javës do vendoset çmim tavan për naftën
• Meta: Partia e Lirisë e hapur për të bashkëpunuar me çdo faktor opozitar