Blinken do të vizitojë Izraelin pas sulmeve të Hamasit

Sekretari amerikan i Shtetit, Antony Blinken, do të vizitojë Izraelin në një mision urgjent për të treguar mbështetjen e SHBA-së pas sulmeve të militantëve palestinezë të Hamasit ndaj Izraelit, bëri të ditur Departamenti amerikan i Shtetit.

Sipas DASH-it, Blinken do të vizitojë Izraelin në ditët në vijim për të dërguar një mesazh të solidaritetit dhe mbështetjes së SHBA-së për Izraelin.

Ai po ashtu do të flasë për “burimet shtesë që ne mund t’iu japim”, tha DASH-i.

Njoftimi erdhi teksa presidenti i Shteteve të Bashkuara, Joe Biden, dënoi sulmet e grupit militant palestinez, Hamas, ndaj Izraelit, duke i cilësuar si sulme “të liga”, dhe tha se Uashingtoni është i gatshëm të dislokojë më shumë asete ushtarake në rajon.

Grupi militant palestinez ka kryer mizori përfshirë vrasje të familjeve të tëra dhe përdhunim të grave, por ka raportime “të tmerrshme për vrasjen e foshnjave”, tha Biden nga Shtëpia e Bardhë.

“Ky është një akt i ligësisë së pastër”, tha lideri amerikan.

Biden konfirmoi se të paktën 14 amerikanë janë vrarë dhe një numër tjetër janë kapur pengje nga Hamasi, i cili ka kërcënuar se do të vrasë pengjet nëse Izraeli nuk paralajmëron civilët para se të sulmojë Gazën.

LEXONI GJITHASHTU:

• Blinken: Ka raporte për disa amerikanë të vrarë në Izrael
• Vuçiç bisedon me Blinken: Refuzova masat ndaj Serbisë