Blinken: Ideja e Trumpit që SHBA ta marrë nën kontroll Grenlandën s’do të realizohet

Sekretari amerikan i Shtetit, Antony Blinken, ka thënë se bota “nuk duhet të humbë shumë kohë” me atë që është duke e thënë presidenti i zgjedhur amerikan, Donald Trump, rreth Grenlandës.

Trumpi e bëri të qartë përsëri këtë javë se dëshiron që territori gjysmautonom i Danimarkës të vihet nën kontrollin e Shteteve të Bashkuara dhe tha se nuk e hedh poshtë as mundësinë e përdorimit të forcës ushtarake për ta arritur këtë.

“Neve na nevojitet Grenlanda për qëllime të sigurisë kombëtare”, tha Trump.

Megjithatë, sekretari në shkuarje i Shtetit tha se qëllimet e presidentit të ri amerikan me gjasë nuk janë asgjë më shumë se vetëm fjalë.

“Ideja e shprehur për Grenlandën nuk është e mirë, natyrisht”, tha Blinken gjatë një vizite në Paris.

“Mbase më e rëndësishme është, sigurisht, ideja se kjo nuk do të ndodhë. Prandaj, ne mbase nuk duhet të humbim shumë kohë duke folur për këtë”, tha ai.

LEXONI GJITHASHTU:

• Franca kundër planit të Trump për të marrë Grenlandën: BE s’lejon cënimin e kufijëve
• Trump: Anëtarët e NATO-s duhet të rrisin shpenzimet e mbrojtjes në 5% të PBB-së