Blinkeni: Izraeli gabon nëse e pushton Rafahun e Gazës

Sekretari amerikan i Shtetit, Antony Blinken, ka thënë të enjten se Izraeli do të gabojë nëse kryen ofensivë të madhe tokësore në qytetin jugor të Rripit të Gazës, Rafah, dhe se ajo është e panevojshme për ta mposhtur Hamasin – grupin palestinez të shpallur terrorist nga Shtetet e Bashkuara dhe Bashkimi Evropian.

Deklarata e Blinkenit tregon se tensionet mes Shteteve të Bashkuara dhe Izraelit janë duke u rritur.

Blinken, i cili po e viziton Lindjen e Mesme për herë të gjashtë urgjentisht prej se nisi lufta më 7 tetor, u takua me diplomatët e lartë arabë në Kajro për të diskutuar për arritjen e një armëpushimi në Gazë dhe për planet për të ardhmen e enklavës palestineze pas luftës.

Ai tha se “një armëpushim i menjëhershëm dhe i qëndrueshëm” me lirimin e pengjeve izraelite që po mbahen nga Hamasi është tejet i nevojshëm menjëherë.

Blinken theksoi se hendeku është duke u ngushtuar në negociatat indirekte që SHBA-ja, Egjipti dhe Katari janë duke i ndërmjetësuar tash e sa javë.

Ai do të udhëtojë drejt Izraelit të premten për t’u takuar me kryeministrin izraelit, Benjamin Netanyahu, dhe kabinetin e tij të luftës.

Rritja e mosmarrëveshjeve mes Netanyahut dhe presidentit amerikan, Joe Biden, për mënyrën se si Izraeli po e zhvillon luftën në Gazë, me gjasë do t’i lënë nën hije këto bisedime – posaçërisht vendosmëria e Netanyahut për ta nisur ofensivën tokësore në Rafah, ku më shumë se një milion palestinezë kanë kërkuar strehim nga lufta ajrore dhe tokësore e Izraelit në veri të territorit.

Netanyahu pretendon se pa pushtimin e Rafahut, Izraeli nuk mund ta arrijë synimin për shkatërrimin e Hamasit, i cili e kreu sulmin e 7 tetorit dhe mori pengje, gjë që i nxiti bombardimet dhe ofensivën e Gazës nga Izraeli.

“Një operacion i madh ushtarak në Rafah do të ishte gabim, diçka që ne nuk e mbështesim. Dhe, ajo nuk e nevojshme për t’u marrë me Hamasin”, tha Blinken në një konferencë për media të enjten në Kajro.

LEXONI GJITHASHTU:

• Blinken vazhdon përpjekjet diplomatike për arritjen e një armëpushimi në Gazë
• Blinken mbërrin në Lindjen e Mesme, në një përpjekje të re për armëpushim