“Bordi i Paqes, një rival i OKB-së”, profesori Shala jep detajet: Ja si do të funksionojë kjo organizatë

Këtë të diel, në emisionin Review, me moderatore Greta Topjana në Euronews, tema e diskutimit ishte e fokusuar në funksionin e Bordit të Paqes për Gazën, një organizatë e krijuar dhe e kryesuar nga presidenti i SHBA-së, Donald Trump.

Profesori Xhavit Shala, i ftuar në emision, dha detaje mbi funksionimin e këtij bordi.

“Gjithë qëllimi i bordit është te Gaza. Faktikisht, faza e parë ishte armëpushimi dhe dorëzimi i pengjeve dhe i trupave të vdekur. Ajo fazë u përmbyll me sukses. Faza e dytë u vonua shumë dhe kjo ka çuar në shkeljen e armëpushimit. Janë vrarë gjatë prishjes 200 palestinezë.

Ky Bord i Paqes ka tre nivele. Është kryetari, i cili ka autoritet të padiskutueshëm. I jepet autoritet sa OKB-ja dhe Këshilli i Sigurimit. Është një model tjetër si organizatë. Është një model që do të ndërhyjë edhe në konflikte të tjera. Pra, është një organizatë që do të rivalizojë OKB-në.

Kryetari është autoriteti absolut. Më pas është Bordi Ekzekutiv, anëtarët e të cilit kanë kompetenca, dhe do të ketë edhe një të deleguar të posaçëm. Niveli i parë është Asambleja. Është një organizatë që nuk është ndërtuar vetëm për Gazën. Kjo është ajo që po diskutohet më së shumti,” – tha Shala.