Bordi i Transparencës publikon çmimet e reja të karburanteve

Bordi i Transparencës është mbledhur këtë të hënë, më 19 maj 2026, dhe ka vendosur çmimet e reja tavan për shitjen e karburanteve në tregun vendas.

Sipas vendimit, çmimi i shitjes me pakicë i naftës nuk duhet të kalojë 205 lekë për litër, që është 3 lekë më shumë se mbledhja e fundit e bordit, ndërsa çmimi i shitjes me shumicë është përcaktuar në jo më shumë se 193 lekë për litër.

Ndërkohë, çmimi i shitjes me pakicë për benzinën është caktuar në jo më shumë se 189 lekë për litër, 1 lekë më shumë se vendimi i fundit i bordit, ndërsa ai i shitjes me shumicë në 177 lekë për litër.

Çmimet e reja kanë hyjnë në fuqi këtë të martë, në orën 17:00, dhe do të mbeten në fuqi deri në mbledhjen e radhës së Bordit të Transparencës, ku pritet të rishikohen në varësi të lëvizjeve në treg.

Bordi u bën thirrje të gjithë operatorëve të tregtimit me shumicë dhe pakicë që të zbatojnë me rigorozitet vendimin, ndërsa paralajmëron se në rast shkeljesh do të merren masa deri në pezullimin e aktivitetit.

Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, vijojnë angazhimin për mbrojtjen e konsumatorëve dhe garantimin e konkurrencës së ndershme në treg.

Sipas sqarimit zyrtar, referuar Aktit Normativ nr. 1, datë 3.4.2026, në rast se çmimi i gazoilit kalon 220 lekë për litër ose benzina 200 lekë për litër, aplikohet niveli 80% i akcizës. Me çmimet aktuale të vendosura nga bordi, këto kufij nuk tejkalohen, ndaj vijon të aplikohet niveli i plotë i akcizës, 100%.