Përfaqësuesi i Lartë i Bashkimit Evropian për Politikë të Jashtme dhe Siguri, Zhozef Borell deklaroi se nuk ka mbështetje të mjaftueshme nga të gjitha vendet anëtare të unionit për të vendosur embargo të plotë ndaj naftës dhe gazit rus.
Për gazetën gjermane Die Welt, Borell tha se Bashkimi Europian nuk ka ende një qëndrim të unifikuar.
“Për momentin, ne në BE nuk kemi një qëndrim të unifikuar për këtë çështje”, tha Borrell për gazetën.
Borrell bëri me dije se kjo temë do të diskutohet në samitin e ardhshëm të BE-së që do të mbahet në fund të muajit të ardhshëm, shkruan Reuters.
Disa vende të BE-së po bëjnë presion për një paketë të gjashtë sanksionesh ndaj Rusisë dhe Brukseli po përgatit një vlerësim të plotë të ndikimit që mund të ketë embargoja ndaj naftës ruse.
Rusia është furnizuesi më i madh i naftës në Evropë, duke siguruar pak më shumë se një të katërtën e importeve të naftës në BE në vitin 2020, sipas të dhënave nga Eurostat.
LEXONI GJITHASHTU
- Eurodeputetët kërkojnë embargon e disa produkteve ruse
- Rusia vijon të furnizojë me gaz Europën përmes Ukrainës
