Borxhi publik është ulur në vitin 2024 në nivelin 54.7% të Prodhimit të Brendshëm Bruto. Kjo rënie i dedikohet të ardhurave, të cilat vitin e kaluar u rritën përtej parashikimit të ministrisë së Financave. Borxhi llogaritet të jetë sot në shumën 1.4 trilionë lekë, me rënie rreth 6 mld lekë që nga fundi i vitit 2023.

Niveli i borxhit nën 55%, tregon se ky është niveli më i ulët që nga viti 2009 dhe sipas stokut, rënia më e madhe vjen nga shlyerja  borxhit të jashtëm, i cili në vitin e kaluar rezultoi në 23,1% të PBB-së, ose 3% më pak se vitin paraardhës.

Një rënie të konsiderueshme ka pësuar edhe shërbimi i borxhit, i paguar nga shteti shqiptar, i cili ka arritur në 50 miliardë lekë, nga 101 miliardë që kushtonte në fund të 2023-shit, ku kontribut në këtë drejtim ka dhënë edhe zhvlerësimi i euros në raport me lekun.

Nga ana tjetër, Fondi Monetar Ndërkombëtar paralajmëron se shpenzimet publike të vendit do të rriten së paku me 7% të PBB-së në dhjetë vitet e ardhshme dhe pjesa më e madhe e parave do të shkojnë për sigurime shoqërore, për mirëmbajtje, investime dhe digjitalizim.