Bota kritikon Rusinë: Tërheqja nga akordi i transportit të grurit, katastrofë

Rusia do të njoftojë zyrtarisht sekretarin e përgjithshëm të OKB-së, Antonio Guterres për tërheqjen nga akordi për transportin e drithërave. Lajmin e bëri të ditur përfaqësuesi i Kremlinit në Kombet e Bashkuara, Dmitry Polyanskiy.

Në profilin e tij në Twitter, diplomati rus përsëriti qëndrimin e Moskës se vendimi ishte marrë pas një sulmi ukrainas ndaj anijeve ushtarake ruse, që garantonin sigurinë e transportit të drithërave.

Ndërkohë, për presidentin ukrainas, kriza ushqimore kishte nisur më parë.

“Rusia filloi qëllimisht rëndimin e krizës ushqimore që në shtator, kur bllokoi lëvizjen e anijeve me ushqimin tonë. Ky është një synim i hapur i Rusisë për të rikthyer kërcënimin e urisë masive në Afrikë dhe Azi”- tha Volodymyr Zelensky, president i Ukrainës.

Shefi i Politikës së Jashtme të BE-së, Josep Borrell i bëri thirrje Rusisë në Twitter që të rishikojë vendimin e saj.

“Ai vë në rrezik eksportin e drithërave dhe fertilizuesve, aq të nevojshëm për të luftuar krizën ushqimore globale”, u shpreh Borrell.

Një reagim erdhi edhe nga Uashingtoni.

“Vendimi është mizor dhe do të rrisë vdekjen nga uria. Nuk kishte arsye që ata ta bënin këtë. Akordi u negociua nga OKB dhe vetëm ajo mund t’i japë fund”- theksoi Joe Biden, president i SHBA.

Marrëveshja u ndërmjetësua nga Kombet e Bashkuara dhe mundësoi eksportet e grurit ukrainas përmes detit të Zi, në një kohë krize globale të shkaktuar pikërisht nga lufta në Ukrainë.

LEXONI GJITHASHTU: 

• Shqiptarët më të stresuar në rajon
• Spahiu: Rama e Berisha po bëjnë lojë që shkon përtej kufijve të durimit