Brazil, policia përplaset me protestuesit kundër presidentit Bolsonaro

Mbështetësit por edhe kundërshtarët e presidentit brazilian, Jair Bolsonaro, dolën që të protestojnë në Sao Paolo këtë të diel, ndërsa policia u përball me kundërshtarët e presidentit.

Mbështetësit e Bolsonaros ishin vetëm pak metra më tej, në të njëjtën rrugë.

Protestuesit përmbysën kazanët e plehrave dhe u vunë flakën, si dhe hodhën mjete të forta kundër policisë.

Të dyja demonstratat ishin organizuar në të njëjtën kohë nëpërmjet rrjeteve shoqërore.

Presidenti Bolsonaro, i cili erdhi në pushtet në janar të vitit 2019, është kritikuar shumë për mënyrën se si është menaxhuar kriza e coronavirusit.

Ai e ka trajtuar shpesh pandeminë si diçka jo serioze dhe i ka quajtur kufizimet e vendosura nga guvernatorët si veprime që kanë paralizuar ekonominë.

Brazili numëroi më shumë se 33 mijë të infektuar të rinj vetëm ditën e shtunë, ndërkohë që numri në total i të prekurve ka shkuar në më shumë se gjysmë milioni, duke i renditur të dytët në botë pas SHBA-ve.

Numri i të vdekurve deri tani ka arritur në 28.834, me 965 të vdekur në 24 orë.

Shumë shtete braziliane kanë nisur t’i lehtësojnë masat, pavarësisht paralajmërimeve të ekspertëve të shëndetësisë.