Britania e Madhe përjashton dërgimin e trupave të NATO-s në Ukrainë

Sekretari i Jashtëm britanik ka këmbëngulur se trupat e NATO-s nuk do të dërgohen në Ukrainë.

Lordi David Cameron tha për mediat e huaja se aleanca ushtarake “po shikon një mision të NATO-s për Ukrainën, jo një mision të NATO-s në Ukrainë”.

Sipas Sky News, aleanca ka shmangur vendosjen e forcave të saj ushtarake në terren në Ukrainë pasi nuk dëshiron një konflikt të drejtpërdrejtë me forcat ruse.

Megjithatë, presidenti francez Emmanuel Macron, herë pas here i parë si një përçarës diplomatik, propozoi më parë se trupat e NATO-s në Ukrainë nuk mund të “përjashtoheshin”.

Kur Lord Cameron u pyet nëse ai mund të shihte ‘çizmet’ e NATO-s në terren në Ukrainë, ai tha “Jo”, duke shtuar: “Unë mendoj se ne nuk duam t’i japim Putinit një objektiv të tillë dhe NATO mund të bëjë shumë gjëra për të koordinuar më mirë ndihmën që i japim Ukrainës”.

“Por, në thelb, për vendet si Britania dhe të gjithë ata që mbështesin Ukrainën, kjo është një çështje e vullnetit politik. A kemi durim? A kemi vullnet? A jemi të përgatitur të japim burimet? Tani, në rastin e Britanisë, padyshim që përgjigja është po”, tha ai.

LEXONI GJITHASHTU:

• Finlanda dhe Ukraina nënshkruajnë marrëveshje afatgjatë të sigurisë
• Ukraina nis regjistrimin e dëmeve të luftës