Britania, Franca dhe Kanadaja paralajmërojnë Izraelin: Do ndërmarrim veprime nëse…

Mbretëria e Bashkuar është distancuar nga pozicioni i saj tradicionalisht i rezervuar ndaj Izraelit, duke iu bashkuar Kanadasë dhe Francës në një deklaratë të përbashkët kundër ofensivës së re në Gaza.

“Niveli i vuajtjeve njerëzore në Gaza është i patolerueshëm. Ne e kundërshtojmë fuqimisht zgjerimin e operacioneve ushtarake të Izraelit”, thuhet në deklaratën e përbashkët të kryeministrit britanik Keir Starmer, homologut kanadez Mark Carney dhe presidentit francez Emmanuel Macron, disa orë pas njoftimit të kryeministrit izraelit Benjamin Netanyahu për synimin e tij për të marrë kontrollin e plotë të Rripit të Gazës.

Liderët theksuan se moslejimi i ndihmës humanitare nga qeveria izraelite është i papranueshëm dhe potencialisht në kundërshtim me ligjin ndërkombëtar humanitar.

“Nëse Izraeli nuk ndal ofensivën ushtarake dhe nuk lehtëson aksesin e ndihmave humanitare, ne do të ndërmarrim veprime të mëtejshme konkrete”, paralajmëruan ata.

Në prag të konferencës ndërkombëtare të 18 qershorit, që do të mbahet nën kujdesin e Kombeve të Bashkuara dhe me mbështetjen e Francës dhe Arabisë Saudite, tre liderët u angazhuan për të shtyrë përpara një zgjidhje me dy shtete.

Ata shprehën gatishmërinë për të njohur shtetin e Palestinës, duke e konsideruar këtë hap si një kontribut konkret për paqen dhe zgjidhjen përfundimtare të konfliktit.

Sipas The Guardian, në takimin përgatitor të zhvilluar në Nju Jork, Arabia Saudite u bëri thirrje vendeve që ende nuk e kanë njohur Palestinën që ta bëjnë këtë, duke theksuar se “njohja duhet parë si parakusht për paqen, e jo si produkt i saj”.

Aktualisht, 147 vende anëtare të Kombeve të Bashkuara e kanë njohur shtetin e Palestinës. Franca ka deklaruar se është e gatshme ta ndërmarrë këtë hap, por e lidh vendimin me rezultatin e konferencës së ardhshme. Një vendim i ngjashëm pritet edhe nga Britania.

LEXONI GJITHASHTU:

• “Gaza po përjeton vdekje të tmerrshme”, kreu i OKB thirrje Izraelit: Lejo ndihmat
• “Gjenocidi në Gaza, më i pashembullti në histori”, eksperti: U hodh bomba 2000 kg…