Brukseli synon kompetenca ekzekutive për Frontex në Shqipëri

Bashkimi Europian synon që t’u japë kompetenca të zgjeruara agjentëve të Frontex në Shqipëri. Brukseli ka dhënë autorizimin për të negociuar një marrëveshje të re, që do të zëvendësojë aktualen, sipas të cilës oficerët e agjencisë europiane të ruajtjes së kufirit kanë mandat të kufizuar vetëm në operacione të përbashkëta me autoritetet shqiptare.

Vendimi është marrë nga Këshilli Europian, që thotë se marrëveshja e re do të mundësojë që stafi i Frontex të ushtrojë kompetenca ekzekutive, si kontroll kufitar të pavarur nga autoritetet shqiptare dhe regjistrim personash. 

Autorizimi për nisjen e bisedimeve veç Shqipërisë është dhënë edhe për Bosnjen, Malin e Zi dhe Serbinë. 

Shqipëria u bë vendi i parë jo anëtar i BE-së që përfshiu në ruajtjen e kufirit agjencinë Frontex përmes një marrëveshjeje të nënshkruar në vitin 2019.

Në vitin 2021 marrëveshja u zgjat mes akuzave që shpërthyen ndaj Frontex për kthim të paligjshëm të emigrantëve, keqtrajtim të tyre e deri për ngacmime seksuale. Për këto akuza, zyra europiane kundër korrupsionit nisi një hetim.  

LEXONI GJITHASHTU: 

• Përmbytjet në Shkodër, dëmtohet ura e vjetër e Bacallekut në hyrje të qytetit
• Psikologia Bekteshi: Fëmijët në Shqipëri shfrytëzohen për punë