Bundesligë, një trajnere do të drejtojë ekipin e meshkujve

Union Berlin shkruan historinë, duke emëruar Marie-Louise Eta si trajneren e parë femër të një skuadre meshkujsh në Bundesligë.

Vendimi vjen në një moment kritik për skuadrën, e cila po lufton për të siguruar mbijetesën në elitën e futbollit gjerman. 34-vjeçarja merr drejtimin e ekipit pas shkarkimit të Steffen Baumgart, i cili u largua së bashku me stafin e tij pas humbjes 3-1 ndaj Heidenheim, skuadrës së fundit në renditje.

Eta, e cila deri më tani drejtonte ekipin e meshkujve U-19 të Union Berlin, ishte planifikuar të merrte drejtimin e skuadrës së femrave nga sezoni i ardhshëm. Megjithatë, situata emergjente në ekipin e parë solli promovimin e saj të menjëhershëm. Ajo tashmë ka lënë gjurmë në histori, pasi në vitin 2023 u bë asistentja e parë femër në Bundesligë dhe në pesë kampionatet kryesore të Evropës.

Union Berlin aktualisht renditet në vendin e 11-të nga 18 ekipe, vetëm shtatë pikë larg zonës së rënies, ku ndodhet St. Pauli.

Me vetëm pesë ndeshje të mbetura deri në fund të sezonit, Eta do të ketë një mision të vështirë për të mbajtur skuadrën në elitë. Sfida e parë për trajneren e re do të jetë përballja ndaj Wolfsburg, një tjetër ekip i përfshirë në betejën për mbijetesë, në një ndeshje që pritet të jetë vendimtare për fatin e sezonit.