Lulzim Basha duhet të tërhiqej pas dorëheqjes si kryetar i PD-së, e jo të bënte një hap pas për të bërë një hap para. Kështu u shpreh në Now me Erla Mëhillin deputeti i PD-së Oerd Bylykbashi.
“Ai ka bërë një hap pas, por do të bëjë përsëri hapa para. Ai konkludoi me humbje njëra pas tjetrës. Ai pas dorëheqjes duhet të ikte. Mund të kthehej kohë më pas. Basha ka thënë unë tërhiqem për të vazhduar”, u shpreh Bylykbashi.
Deklaratës së Bashës se Komisioni i Rithemelimit nuk po punon për bashkimin e PD-së, Bylykbashi iu përgjigj duke thënë se “sa më shumë Basha do të bëjë përpjekje për të destabilizuar grupin parlamentar të PD-së, aq më e përçarë do të jetë PD-ja”.
Bylykbashi tha se Lulzim Basha nuk mund t’i përcaktojë kushte askujt prej Komisionit të Rithemelimit.
Ankimimin e Enekelejd Alibeajt për vendimin e gjykatës që njohu Kuvendin e 11 dhjetorit, Bylykbashi e quan jo legjitim.
Bylykbashi thotë se Enkelejd Alibeaj “nuk është nënkryetar i PD-së dhe se PD nuk ka as kryetar e as nënkryetar”.
“Gjykata i njohu ndryshimet dhe Alibeaj nuk e ka këtë funksion”, tha ai.
Bylykbashi tha se organi që përfaqëson PD-në është Komisioni i Rithemelimit.
Ai tha se kërkesën për regjistrimin e Komisionit të Rithemelimit, e ka bërë ky komision dhe sqaroi pse sipas tij Alibeaj nuk ka të drejtë të ankimojë vendimin e gjykatës.
“Ligji parashikon se ankimi është akti me të cilin palët, ose pjesëmarrësit e tjerë në proces parashtrojnë kundërshtimet e tyre ndaj vendimit të Gjykatës. Palë e vetme në këtë proces ka qenë Komisioni i Rithemelimit”, sqaroi Bylykbashi.
LEXONI GJITHASHTU:
- Basha i shmanget pyetjes për rikandidimin në krye të PD-së
- Gjykata njeh Kuvendin Kombëtar të Berishës
