Cakaj takon ambasadorin e Kosovës në Holandë: Serbia ka nevojë për Gjykatë Speciale

Ministri i Jashtëm në detyrën, Gent Cakaj gjatë një vizite të tij në Holandë ka zhvilluar dhe një takim me ambasadorin e Kosovën në këtë vend, Lirim Greiçevci. Cakaj thotë se gjatë takimit ka biseduar për Gjykatën Speciale duke u shprehur se është Serbia që ka nevojë për një gjykatë të tillë dhe jo Kosova pasi krimet luftës në Kosovë janë hetuar e gjykuar nga UMNIK-u, EULEX-i, Tribunali i Hagës dhe drejtësia vendore.

Sipas tij, Gjykata Speciale, jo vetëm merr përsipër të hetojë e gjykojë sërish një palë që ka mbyllur llogaritë me drejtësinë ndërkombëtare por edhe e bën këtë në mënyrë të njëanshme duke vënë në shënjestër vetëm strukturat e UÇK-së.

“Krimet kundër njerëzimit, spastrimi etnik dhe gjenocidi i Serbisë në Kosovë, jo vetëm që nuk janë hetuar e gjykuar mjaftueshëm, por sot ato përgjithësisht nuk përmenden fare dhe bashkësia ndërkombëtare kryesisht qëndron e heshtur para tyre.

Për Tribunale Ndërkombëtare e Gjykata Speciale ka nevojë Serbia për të gjitha mizoritë e kryera në Kosovë, e jo Kosova për luftën e saj çlirimtare! Pavarësisht kësaj, duhet theksuar se historinë e Republikës së Kosovës dhe shqiptarëve, nuk mund ta shkruajë askush! Mbështetje e solidaritet i plotë i Shqipërisë me Kosovën në këto rrethana jo të lehta për krejt kombin shqiptar”, shprehet Cakaj.