Çfarë dihet deri më tani për sulmin në sinagogën e Mançesterit

Një burrë është qëlluar me armë zjarri nga policia pas një sulmi të ndodhur pranë një sinagoge në Mançester, ku humbën jetën dy persona.

Sulmi ndodhi në ditën më të shenjtë të kalendarit hebraik, Yom Kippur, dhe përfshiu përdorimin e një makine dhe një thike, sipas Policisë së Madhe të Mançesterit (GMP). Të paktën dy persona të tjerë raportohet se janë plagosur.

Policia u njoftua për incidentin në orën 09:31 të mëngjesit të së enjtes, pas raportimeve për një burrë të plagosur me thikë dhe për një automjet që ishte drejtuar në drejtim të qytetarëve pranë Sinagogës së Kongregacionit Hebraik Heaton Park në Crumpsall.

Raportime të mëtejshme nga publiku treguan se një roje sigurie ishte sulmuar me thikë. Ngjarja ndodhi në Middleton Road, në Crumpsall – një lagje rreth tre milje në veri të qendrës së qytetit të Mançesterit.

Burri i dyshuar si autor i sulmit u qëllua nga policia në vendngjarje në orën 09:38 të mëngjesit. Një video e publikuar në rrjete sociale duket se tregon momentin kur oficerët e policisë drejtojnë armët ndaj një personi të shtrirë në tokë përpara sinagogës. Në video dëgjohen oficerët duke u bërtitur kalimtarëve “kthehuni” dhe “lëvizni përpara”, ndërsa personi i shtrirë duket se përpiqet të ngrihet përpara se të dëgjohet një e shtënë arme.

Në përditësimin e fundit, GMP bëri të ditur se burri i qëlluar nga policia “besohet të ketë vdekur”.

Policia konfirmoi më pas se dy persona kishin ndërruar jetë në vendngjarje, ndërsa dy të tjerë po trajtohen për plagë të shkaktuara nga përdorimi i automjetit dhe thikës. Gjendja e tyre nuk është bërë e ditur.

Aktualisht, forcat e armatosura të policisë, shërbimet emergjente dhe ekipet zjarrfikëse ndodhen në vendngjarje. Rruga Middleton është mbyllur midis Wilton Road dhe Crumpsall Lane, ndërsa është vendosur një kordon sigurie.

Shërbimi i Ambulancës së Veriperëndimit njoftoi se ka dërguar burime në vendin e ngjarjes dhe se po punon në bashkëpunim me shërbimet e tjera emergjente për të siguruar ndihmën e nevojshme mjekësore.

LEXONI GJITHASHTU:

• Sulm me thikë në Britani, disa të plagosur! Policia qëllon autorin