Çfarë dihet nga tragjedia e dytë ajrore brenda pak ditësh në SHBA

Një aeroplan i vogël mjekësor është rrëzuar mbi disa ndërtesa në veri-lindje të Filadelfias të premten në mbrëmje, duke shkaktuar zjarr të madh dhe dëme të konsiderueshme në pronat përreth. Përplasja ka plagosur disa persona në tokë, ndërsa autoritetet mendojnë se 6 personat në bord kanë ndërruar jetë.

Sipas kompanisë Jet Rescue Air Ambulance, avioni Learjet 55 po kryente një mision transporti mjekësor dhe kishte në bord gjithsej gjashtë persona: katër anëtarë të ekuipazhit, një pacient fëmijë dhe një të afërm të tij.

Menjëherë pas përplasjes, ekipet e shpëtimit mbërritën në zonë, ndërsa dëshmitarët raportuan skena kaotike me banesa dhe automjete të përfshira nga flakët.

“Pashë një top të madh zjarri që ndriçoi qiellin,” tha një dëshmitar, duke përshkruar momentin e përplasjes. Të dhëna të tjera tregojnë se copëza të avionit dëmtuan makina dhe ndërtesa në zonën përreth.

Sipas Jet Rescue Air Ambulance, fëmija në bord po udhëtonte për në Tijuana, në Meksikë, pas trajtimit për një sëmundje të rëndë për jetën në SHBA. Ai shoqërohej nga nëna e tij, një pilot, një ndihmëspilot, një mjek dhe një ndihmës mjek.

Administrata Federale e Aviacionit (FAA) raportoi se avioni u ngrit nga Aeroporti Verilindor i Filadelfias rreth orës 18:30 me kohën lokale dhe u rrëzua vetëm 6.4 km më larg. Fillimisht, autoritetet raportuan për dy persona në bord, por më vonë konfirmuan se ishin gjashtë.

Bordi Kombëtar i Sigurisë së Transportit ka nisur një hetim për të përcaktuar shkaqet e aksidentit.

Kryebashkiakja e Filadelfias, Cherelle Parker, u bëri thirrje banorëve të mos afrohen në vendngjarje dhe të raportojnë çdo mbeturinë të dyshimtë. “Nëse shihni mbeturina, telefononi 911, mos prekni asgjë,” paralajmëroi ajo.

Kjo përplasje vjen vetëm dy ditë pas një tjetër tragjedie ajrore ndodhi në Uashington DC, ku një avion pasagjerësh dhe një helikopter ushtarak u përplasën, duke shkaktuar 67 viktima.

Hetimet për aksidentin në Filadelfia vazhdojnë, ndërsa autoritetet po punojnë për gjetjen e trupave të viktimave.

LEXONI GJITHASHTU:

• Përplasja tragjike e avionit me helikopterin ushtarak, kush janë viktimat
• VIDEO| Momenti kur helikopteri i ushtrisë përplas avionin e pasagjerëve në SHBA