Çmimi i ulët kërcënon prodhimin, fermerët në Elbasan nuk mbulojnë kostot

Fermerët e Jagodinës, që njihet edhe si zona më të pasur bujqësore e Elbasanit, paralajmërojnë për një situatë të vështirë për prodhimin e lakrës së Brukselit. Edhe pse kultura është e certifikuar dhe e gjithë prodhimi shkon për eksport, çmimi i këtij viti mbetet shumë i ulët dhe nuk përballon kostot e prodhimit.

“Kemi çmimet përtokë, çdo gjë është zero, po s’më dha kjo dorë mua, unë s’kam çfarë mbjell më me dorën tjetër. Çdo gjë është shtrenjtë, që te fidani, te plastmasi. Nuk e kanë fajin këto, e ka fajin shteti sepse duhet të vërë dorë. Çmimi sot duhet të ishte 50 lekë më i lartë minimumi te fermeri. Ndoshta është te pika, por këtu janë 20 lekë. Fermeri është i fundit, e kanë rraskapitur nga tre-katër çanta, unë nuk di në jetë të mbaj një çantë me lekë”, tha fermeri Pandeli Hysa.

Fermeri tregon se situata është dramatike edhe për shkak të marrëveshjeve me grumbulluesit dhe kostove të transportit.

“Unë kam 19 dynym lakër me çertifikatë, jo fjalë rreme, ja ku i ke live. Nuk më bën zemra t’i spërkas, t’i bëj asilloj gjëje, se është shumë çmim i ulët. Vijnë grumbulluesit, i marrin, i dërgojnë nëpër pika. Janë dy-tre pika që punojnë këtu dhe na del shumë çmim i ulët. Me shku deri atje është shumë lart, po këtu te ne 20 lekë merret, sot për sot është zero”, shtoi Hysa.

Sipërfaqja e kultivuar me lakër Brukseli në këtë zonë shkon mbi 70 hektarë, ndërsa çdo vit grumbullohen rreth 3 mijë tonë për eksport. Fermerët paralajmërojnë se, nëse çmimi nuk rritet, vazhdimësia e kultivimit të kësaj kulture mbetet në pikëpyetje.