Danimarka planifikon heqjen e çdo mase kundër COVID

Danimarka planifikon të heqë kufizimet kundër COVID-19 më 1 shkurt.

Ky vendim vjen në një kohë kur në vend konfirmohen shifra të larta infektimesh çdo ditë.

Arsyeja e heqjes së kufizimeve vjen prej shkallës së lartë të vaksinimit në atë shtet, e cila konsiderohet e mjaftueshme kundër variantit më të butë Omicron, tha të mërkurën Ministria e Shëndetësisë në vend.

Nëse një komision parlamentar miraton propozimin e qeverisë më vonë të mërkurën, Danimarka do të bëhet vendi i parë i Bashkimit Evropian që heq kufizimet, pavarësisht nga vala e infeksioneve me Omicron që përfshiu kontinentin.

“Dëshiroj që COVID-19 të mos kategorizohet më si një sëmundje e rrezikshme për shoqërinë që nga 1 shkurti”, shkroi Ministri i Shëndetësisë Magnus Heunicke në një letër drejtuar ligjvënësve.

Kjo do të çonte në heqjen e të gjitha kufizimeve, duke përfshirë përdorimin e një pasaporte të vaksinimit, mbajtjen e maskave dhe mbylljet e herët për baret dhe restorantet.

Megjithatë, Danimarka do të mbajë disa masa në kufijtë e vendit për katër javë të tjera, duke përfshirë teste dhe/ose karantinë në varësi të vendit të origjinës së udhëtarëve.

Vendi skandinav hoqi të gjitha kufizimet më 10 shtator. Por në fillim të nëntorit vendosi përdorimin e pasaportës së COVID-19, dhe më vonë vendosi edhe kufizime të reja.

Më 17 janar të këtij viti, Danimarka lehtësoi masat kundër COVID, ku lejoi rihapjen e disa vendeve si kinematë, kopshtet zoologjike, muzetë dhe teatrot.