Zëdhënësi i Departamentit amerikan të Shtetit, Ned Price tha se sulmet e Rusisë në Ukrainë në ditët e fundit, tregojnë se Kremlini po ndërmerr një fushatë terrori kundër popullit ukrainas.
Deklarata e tij u bë teksa u pyet në lidhje me bombardimet në qytetin perëndimor të Lvivit në Ukrainë, shkruan CNN.
“Fakti është se Rusia, më shumë sesa thjesht nisja e një pushtimi po ndërmerr një fushatë terrori, brutaliteti, dhe agresioni të neveritshëm kundër popullit të Ukrainës”, u shpreh ai.
Pentagoni tha më herët gjatë ditës se sulmet ruse në ditët e fundit kanë shënjestruar instilacionet ushtarake.
Të paktën 7 persona mbetën të vrarë dhe 11 të tjerë të plagosur në një sulm me raketa në qytetin e Lvivit.
Sipas autoriteteve lokale, tre raketa goditën infrastrukturë ushtarake, ndërsa një tjetër ra në një fabrikë gomash.
